Bakı Apellyasiya Məhkəməsində arvadını boğaraq qətlə yetirməkdə təqsirləndirilən Nurəddin Məmmədovun barəsindəki hökmdən verilən apellyasiya şikayəti üzrə məhkəmə iclası başlayıb.
Pravda.az-ın əldə etdiyi məlumata görə, hakim Ramin Qaraqurbanlının sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib.
Məhkəmənin növbəti iclası fevralın 4-nə təyin edilib.
Xatırlatma: Bakı Ağır Cinayətlər Məhkəməsinin hökmü ilə Nurəddin Məmmədov 10 il 6 ay müddətinə azadlıqdan məhrum edilib.
İttihama görə, 2024-cü il mayın 5-də paytaxtın Sabunçu rayonu ərazisində 2002-ci il təvəllüdlü Ayşən Məmmədovanın öldürülməsi barədə rayon prokurorluğuna məlumat daxil olub.
Araşdırmalarla 1996-cı il təvəllüdlü Nurəddin Məmmədovun rayonun Ramana qəsəbəsi ərazisində arvadı Ayşən Məmmədovanı boğaraq qəsdən öldürməsinə əsaslı şübhələr müəyyən edilib.
Məlum olub ki, Nurəddin Məmmədov aprelin 28-də yaşadığı Ramana qəsəbəsi ərazisindəki evində olarkən arvadı Ayşən Məmmədovanın naməlum şəxslə "Whatsapp"la görüntülü danışdığını görüb. O arvadının əvvəllər də bir neçə dəfə başqa şəxslərlə əlaqəsi olduğunu aşkar etdiyindən ona xəyanət etdiyini güman edib.
Bundan hiddətlənən Nurəddin telefonu arvadının əlindən alıb və onun başına vurub. Həmin vaxt mətbəx bıçağını götürərək bıçağın dəstəyi ilə Ayşənin təpə nahiyyəsindən bir dəfə zərbə yetirib.
Daha sonra Nurəddin mayın 5-də evə gəlib və arvadı Ayşənin yataq otağında “Whatsapp”la İlqar adlı şəxslə aralarında intim münasibət olması barədə söhbət apardıqlarını və yazışmaları görüb.
Nurəddin Ayşənin ona xəyanət etməsindən əmin olub. O, arvadı ilə mübahisə edə-edə mətbəx otağına daxil olub. Orada qəflətən hər iki əli ilə boğazından tutaraq yerə yıxıb və boğaraq öldürüb.
İstintaq orqanı tərəfindən Nurəddin Məmmədova qarşı Cinayət Məcəlləsinin 120.1-ci (qəsdən adam öldürmə) və 128-ci (qəsdən sağlamlığa yüngül zərərvurma) maddələri ilə ittiham elan edilib.
Kamal Məmmədov
