Bakı Apellyasiya Məhkəməsində qazilərə qarşı dələduzluq etməkdə təqsirləndirilən Şahnaz Rzayeva və Fərmayil Verdiyevin barəsindəki hökmdən verilən apellyasiya şikayəti üzrə məhkəmə iclası başlayıb.
Pravda.az-ın əldə etdiyi məlumata görə, hakim Fərid Əyyubovun sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib.
Məhkəmənin növbəti iclası fevralın 4-nə təyin edilib.
Xatırlatma: Bakı Ağır Cinayətlər Məhkəməsinin hökmü ilə Şahnaz Rzayevaya 1 il 6 ay müddətində azadlığın məhdudlaşdırılması (elektron qolbaq) cəzası təyin edilib. Digər təqsirləndirilən Fərmayıl Verdiyev isə vəfat etdiyi üçün onunla bağlı cinayət işinə xitam verilib.
İttihama görə, Fərmayil Verdiyev və Şahnaz Rzayeva qazilərin kəsilmiş pensiyalarını bərpa etmək adı ilə onlardan 9700 manat pul alıb.
Cinayət işində Birinci Qarabağ müharibəsi qaziləri Camalov Elxan Eldar oğlu, Vəliyev Araz Abasət oğlu, Həsənov Pərvin Sadiq oğlu və Mehdiyev Əlibaba Müzadil oğlu zərərçəkən qismində tanınıb.
Təqsirləndirilən şəxslərə qarşı Cinayət Məcəlləsinin 312.2 ((vəzifəli şəxs tərəfindən bilə-bilə qanunsuz hərəkətlər (hərəkətsizlik) etməyə görə ona rüşvət vermə və ya təkrar rüşvət vermə), 178.2.2 (dələduzluq - təkrar törədildikdə) və 178.2.4-cü( xeyli miqdarda ziyan vurmaqla dələduzluq) maddələri ilə ittiham irəli sürülüb.
Fərmayil Verdiyev bu ilin iyul ayında Penitensiar Xidmətin Müalicə Müəssisəsində böyrək çatışmazlığından vəfat edib.
Kamal Məmmədov
