"Barselona"nın idman direktoru Deko "Əl-Hilal"ın hücumçusu Neymarın Kataloniya klubuna qayıdacağı haqda yayılan məlumatlara münasibət bildirib.
QOL.az xəbər verir ki, mətbuatda 32 yaşlı forvardın Səudiyyə Ərəbistanı təmsilçisindən ayrılacağı, onunla maraqlanlardan birinin isə futbolçunun sabiq klubu "Barselona" olduğu yazılıb.
Deko braziliyalı oyunçu haqda danışarkən bu məlumatları təkzib edib:
"Neymarın "Barselona"ya qayıtması ilə bağlı söhbətlər həmişə olub. Səudiyyə Ərəbistanına getdikdən bəri onun çox dəyərli oyunçu olduğunu bilirik. Neymar formada olanda dünyanın ən güclü futbolçularından biridir. Onun transferi istənilən klubda xoş qarşılanırdı. Heç nəyi istisna etmək olmaz, amma düşünürəm ki, o, indi Braziliyaya qayıdacaq. Ən əsası budur ki, Neymar yenidən futbol oynamalıdır. Bu həm ona, həm də başqalarına sevinc bəxş edəcək. Onun planlarının nə olduğunu bilmirəm, amma ən əsası xoşbəxt olmasıdır”.
Qeyd edək ki, bu mövsüm Neymar zədə səbəbindən "Əl-Hilal"ın heyətində bütün turnirlərdə cəmi 2 matç keçirib.
