"Çox dinamik oyun oldu. Rəqib də güclü komandadır. Nəticə ürəyimiz istəyən kimi olmasa da, qarşılaşma çox yaxşı alındı. Bu nəticəni unudub, növbəti oyunlara hazırlaşacağıq".
Bu sözləri "Şamaxı"nın tanzaniyalı yeni transferi Alfons Msanga Mabula ötən gün Azərbaycan Premyer Liqasının 20-ci turu çərçivəsində doğma meydanda "Zirə" ilə keçirilən görüşdən (1:2) sonra Teleqraf.com-un suallarını cavablandırarkən deyib.
21 yaşlı yarımmüdafiəçi "Şamaxı" forması ilə debüt etməsi barədə də fikirlərini bölüşüb:
"Bu, Azərbaycan çempionatında ilk oyunum idi. Premyer Liqa haqda fikirlərim yüksəkdir. Burada rəqabət var. Fiziki hazırlığımı daha da artırmaq niyyətindəyəm. Çalışacağam ki, növbəti matçlarda komandam üçün əlimdən gələnin ən yaxşısını edim".
O, komanda yoldaşı Arsen Ağcabəyovun son saniyələrdə bada verdiyi real qol şansı ilə bağlı bunları deyib:
"Bu futboldur. Belə hallar tez-tez baş verir, normaldır. Növbəti oyunlara fokuslanmalıyıq".
