Yanvarın 26-da Kolumbiya ABŞ ordusuna məxsus təyyarələrin (deportasiya olunmuş miqrantlarla) ölkəyə eniş etməsinə icazə verməkdən imtina edərək hava məkanını bağladı.
Buna cavab olaraq, Tramp Kolumbiyanı sanksiyalarla hədələdi, o cümlədən Kolumbiyadan idxal olunan mallara 25% rüsum tətbiq edəcəyini və kolumbiyalı məmurların ABŞ-a girişini qadağan edəcəyini elan etdi. Bundan dərhal sonra Kolumbiya prezidenti mövqeyini dəyişərək həmvətənlərinin vətənə qaytarılması üçün öz prezident təyyarəsindən istifadə etməyi əmr etdi.
Tramp isə facebook sosial şəbəkəsində, özünü Çikaqo gansterinə oxşadaraq “FAFO” – “Fck Around, Find Out” (“Odla oynama, yanarsan”) yazısı fonunda çəkilmiş fotosunu paylaşıb.
Bu, Trampın yaxınlarda həbsxanadan azad etdiyi ultra-sağçıların şüarıdır və onların hər zaman döyüşə hazır olduqlarını bildirir.
Daha geniş kontekstdə bu ifadə ingilis dilində "Sına və nəticəsini gör" mənasını verir.
Göründüyü kimi, Tramp Danimarka ilə Qrenlandiya məsələsində, Kanada, Panama, Aİ, NATO və digər ölkələrlə məhz belə davranacağını nümayiş etdirir. O, bunları heç də gizlətmir və birinci prezidentlik dönəmində daha kiçik miqyasda olsa da, artıq bu prosesə başlamışdı.
Görünən o ki, Tramp nə Rusiya, nə də Çinə qarşı eyni qətiyyəti nümayiş etdirmir və etdirməyi də gözlənilmir.
Kamran Cəfərli
visiontv.az
