“Mançester Siti”nin baş məşqçisi Xosep Qvardiola Çempionlar Liqasının 8-ci turunun “Brügge” ilə ev oyunundan gözləntisini paylaşıb.
Arena.az “Mançester Siti”nin rəsmi saytına istinadən, ispan mütəxəssisin bu barədə qənaətini təqdim edir:
“Yalnız qələbə bizə ən yaxşı iyirmidördlükdə yer almağı təmin edəcək. Digər nəticə Çempionlar Liqasında daha da irəli getməyimizə imkan verməyəcək. Biz yaxşı çıxış etsək və “Çelsi” ilə oyunda (3:1) olduğu kimi eyni nəbzi tutaraq oynasaq, onda ələmə mərhələsinə çıxacağıq. Oyundakı əsas rolu, həqiqətən ehtiyac duyduğumuz azarkeşlər oynaya bilərlər”, deyə “Pep” vurğulayıb.
İspan mütəxəssis “şəhərlilər”in mümkün uğursuzluğuna dair sualı da cavablayıb:
“Mövcud vəziyyətdə, biz “Brügge” ilə bu oyunu qazanmalıyıq. Bu baş verməsə, onda yarışda iştirakımızı dayandıracağıq. Daha da irəli getmək üçün ələmə mərhələsinə vəsiqə qazanıb daha iki oyun keçirmək istəyirik.
“Mançester Siti”nin növbəti mərhələyə çıxa bilməməsi nə deməkdir? Bu, klub üçün yaxşı olmazdı, amma mən indi bu barədə düşünmürəm. Bilirəm ki, hamı daha da irəli getməyimizlə maraqlanır. Düşünürəm ki, biz bunu edə biləcəyik”, deyə Xosep Qvardiola vurğulayıb.
7 turdan sonra “Mançester Siti” Çempionlar Liqasının Liqa mərhələsinin yarış cədvəlində 8 xalla 25-ci, “Brügge” isə 11 xalla 20-ci pillədə qərarlaşıb.
“Mançester Siti” – “Brügge” oyunu bu gün, yanvarın 29-da baş tutacaq. Hakim oyunu Bakı vaxtı ilə saat 00:00-da (30 yanvar) başladacaq.
