1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
"Mançester Siti"nin baş məşqçisi Xosep Qvardiola komandasının 2024/25 mövsümündə Çempionlar Liqasını qazanmaq şansları barədə danışıb.
Oxu.Az-ın məlumata görə, bu barədə "CBS Sports" xəbər verib.
Bildirilir ki, ispan mütəxəssis öz qiymətləndirmələrində son dərəcə səmimi və realist olub.
"Bu mövsüm Çempionlar Liqasını qazanmaq? Hazırda bizim üçün bu tapşırığın yerinə yetirilməsi mümkün görünmür. Uğur qazandığımız ildə fikirlərim yalnız qələbə ilə məşğul idi. Mən həmişə mövcud reallığı nəzərə alaraq rasional hərəkət edirəm", - deyə o bildirib.
Qvardiola "Mançester Siti"nin pley-offda potensial rəqiblərinin gücünü qeyd edib:
"Rəqiblərimiz bizdən daha çox təcrübəyə malikdirlər. "Real" çətinliklərlə üzləşə bilərdi, lakin son matçlarda öz oyun səviyyəsinə qayıtdı və nəticələr göstərməyə başladı. "Bavariya" Kompaninin rəhbərliyi altında möhtəşəm mövsüm nümayiş etdirir".
Bununla belə, baş məşqçi öz komandasına olan optimizmini və inamını itirmir.
"Əgər sabah oynamalı olsaydıq, çətin olardı. Lakin bir neçə həftədən sonra vəziyyət dəyişə bilər, rəqibimizin kim olacağı məlum deyil... Biz ciddi hazırlıq keçəcəyik, optimal formada olacağıq və gələcəyin nə gətirəcəyinə baxacağıq", - deyə Qvardiola bildirib.
Qeyd edək ki, "Mançester Siti" əsas Avropa kuboku turnirinin ümumi mərhələsində 22-ci yeri tutub. Beləliklə, pley-off matçlarında Qvardiolanın yetirmələri "Bavariya" və ya "Real"la qarşılaşacaqlar. Pley-off matçlarının püşkü yanvarın 31-də atılacaq.
