Məsələ ilə bağlı Olaylar.az-a açıqlama verən siyasi şərhçi Zeynal Əmrəliyev bildirib ki, Avropa İttifaqının müşahidə missiyasının fəaliyyətinin müddəti ilə bağlı Azərbaycan və Ermənistan arasında konkret razılaşma mövcud idi. Lakin təəssüf ki, həm Avropa İttifaqı, həm də Ermənistan bu razılaşmanı pozur:
"Ermənistan tərəfi missiyanın fəaliyyətini süni şəkildə uzatmaqla Azərbaycan-Ermənistan sülh prosesinə ciddi maneələr yaradır. Eyni zamanda, Avropa İttifaqının bu qərarı Azərbaycanla qurum arasındakı münasibətlərin normallaşmasına əngəllər törədir.
Son dövrlərdə Avropa Şurası Parlament Assambleyası, Avropa Komissiyası və digər Avropa institutlarının Azərbaycana qarşı qeyri-dost yanaşmaları səbəbindən münasibətlərdə gərginlik yaranıb. Müşahidə missiyasının fəaliyyətinin davam etdirilməsi isə bu gərginliyi daha da artırır.
Bundan əlavə, həmin missiyanın yalnız müşahidə fəaliyyəti ilə məşğul olmadığı, kəşfiyyat xarakterli məlumatlar topladığı barədə ciddi narahatlıqlar var. Azərbaycanla sərhəddə yerləşərək binokllarla Azərbaycan ərazisini izləmək, məlumat toplamaq və bu prosesin məqsədlərinin tam açıqlanmaması missiyanın neytrallığına şübhə yaradır. Əgər bu, həqiqətən müşahidə missiyasıdırsa, o zaman hər iki tərəfi izləməlidir. Ermənistan ərazisindən yalnız Azərbaycan tərəfini müşahidə etmək, regionda baş verənlərə birtərəfli yanaşmaq açıq-aşkar qərəzli mövqedir və Azərbaycanın suverenliyinə hörmətsizlik kimi qiymətləndirilə bilər.
Azərbaycan öz torpaqlarını işğaldan azad edib və hazırda həmin ərazilərdə genişmiqyaslı bərpa və quruculuq işləri həyata keçirir. Avropa İttifaqının müşahidə missiyasının bu proseslərə müdaxilə etməsi və sərhəddə mövcudluğunu davam etdirməsi əsassız bir yanaşmadır. Missiyanın fəaliyyətinin uzadılması təkcə Azərbaycan-Avropa İttifaqı münasibətlərinə deyil, eyni zamanda Azərbaycan və Ermənistan arasında sülh prosesinə də ciddi maneələr yaradır".
Qiymət Mahir
