ABŞ prezidenti Donald Tramp administrasiyasının Çinə əlavə 10 faiz gömrük rüsumunun tətbiqini müzakirə etdiyi və bu verginin fevralın 1-dən qüvvəyə minə biləcəyi məlum olub.
Çərşənbə axşamı günü axşam Ağ Evdə jurnalistlərə Tramp deyib:
"Biz Meksika və Kanadaya fentanil göndərdiyinə görə Çinə 10 faizlik rüsum tətbiq etməyi düşünürük. Biz mümkün tarix olaraq 1 fevralı hədəfləyirik".
Bundan əlavə, Meksika və Kanadaya “təxminən 25 faiz” gömrük tarifi tətbiqinin gündəmdə olduğunu bildirən Tramp, bu addımların ABŞ-ın ticarət balansını qorumaq üçün atıldığını bildirib.
Ötən cümə günü Çin Dövlət Başçısı Xi Jinping ilə telefon danışığı apardığını bildirən Tramp, bu danışıq zamanı iki ölkə arasında fentanil böhranı və ticarət əlaqələrinin müzakirə edildiyini bildirib. Çinin yaydığı açıqlamada, Xinin iqtisadi əlaqələrin hər iki tərəf üçün faydalı olduğunu vurğuladığı və əməkdaşlığa çağırdığı bildirilib.
ABŞ-da yerləşən Peterson Beynəlxalq İqtisadiyyat İnstitutunun 17 yanvar hesabatına görə, ABŞ Çinə əlavə 10 faiz gömrük rüsumu tətbiq edərsə və Çin də eyni şəkildə cavab verərsə, bu siyasətlər hər iki ölkənin iqtisadiyyatında ciddi itkilərə səbəb olacaq. Hesabatda Trampın ikinci administrasiyası dövründə ABŞ iqtisadiyyatının ÜDM-nin 55 milyard dollar, Çin iqtisadiyyatının isə 128 milyard dollar azala biləcəyi təxmin edilir.
