Bakı, 29 yanvar, AZƏRTAC
Azərbaycanın yeniyetmə oğlan və qız basketbolçulardan ibarət yığmalarının Avropa çempionatının qrup mərhələsindəki rəqibləri məlum olub.
Azərbaycan Basketbol Federasiyasından AZƏRTAC-a verilən məlumata görə, oğlanlardan ibarət U-18 komandası B divizionunun B qrupunda Rumıniya, Gürcüstan, Danimarka, Ukrayna və Portuqaliya seçmələri ilə qarşılaşacaq. Oyunlar iyulun 25-dən avqustun 3-dək Rumıniyanın Piteşti keçiriləcək.
18 yaşadək qızlardan ibarət yığma da B divizionunun B qrupunda çıxış edəcək. Komanda Bosniya və Herseqovina, Litva, Kosovo, Ukrayna və İslandiya ilə üz-üzə gələcək. Görüşlər iyulun 5-13-də Litvanın Alitus və Vilnüs şəhərlərində reallaşacaq.
İyulun 5-13-də Albaniyanın Tirana şəhərində 16 yaşlı oğlanlar arasında keçiriləcək Avropa çempionatının C divizionunda mübarizə aparacaq Azərbaycan millisi isə Lüksemburq, Andorra, San Marino və Cəbəllütariqlə B qrupuna düşüb.
Qızlardan ibarət U-16 yığmamız isə avqustun 20-29-da Türkiyənin İstanbul şəhərində təşkil ediləcək Avropa çempionatının B divizionunda mübarizə aparacaq. Millimiz B qrupunda Slovakiya, İsveç, Niderland və Lüksemburq seçmələri ilə üz-üzə gələcək.
