Guerrilla marketinq, kiçik büdcəli, lakin böyük təsir yaratmağı hədəfləyən qeyri-adi və diqqət çəkən reklam strategiyasıdır. Bu yanaşma, xüsusən kiçik bizneslər və məhdud büdcəyə sahib olan şirkətlər üçün əlverişlidir. "Gerilla marketinq" termini ilk dəfə 1984-cü ildə Cey Konrad Levinsonun Gerilla Marketinqi adlı kitabında təqdim edilib.
Valyuta.az xəbər verir ki, bu konsepsiya gerilla müharibəsi taktikalarından ilhamlanaraq hazırlanıbdır ki, burada kiçik, strateji və sürpriz hərəkətlərlə böyük nəticələr əldə olunur.
İlk dəfə küçələr, parklar və metro stansiyaları kimi ictimai yerlərdə tətbiq edilib. Burada gözlənilməz reklamlar, qurğular və ya performanslar insanları təəccübləndirirdi.
Brendlərin Kreativ Qazancı
Bir çox böyük brend bu marketinq strategiyasından istifadə edərək öz markalarını daha unudulmaz edib və bazarda fərqlənməyə nail olub.
“McDonald’s” - "Lane crossings"
“McDonald's” şəhər küçələrində zolaq keçidlərini “kartof fri” kimi göstərən sarı xətlərlə bəzədi. Şirkət piyadalar üçün nəzərdə tutulan zolaq keçidlərini öz məhsuluna, xüsusilə də məşhur "French fries" (kartof fri) məhsuluna bənzər şəkildə dizayn etdilər.
Zolaq keçidlərinin ağ xətləri “McDonald's” ın sarı rənginə boyanması zolaqların kartof fri çubuqları kimi görünməsinə səbəb olub. Zolaqların sonun da qırmızı rəngdə “McDonald's” loqosu və ya kartof fri qabı təsviri var idi. Bu, zolaq keçidini tamamlayaraq məhsul imicini gücləndirir.
Bu kampaniya əsasən böyük şəhərlərdə həyata keçirilib. Küçə marketinqi kimi çox insanın toplandığı ərazilər, xüsusilə piyada yolları və restoranların yaxınlığındakı yerlərdə.
“Coca-Cola” – "Share a Coke" Kampaniyası
“Coca-Cola” nın məhşur "Share a Coke" kampaniyası 2011-ci ildə Avstraliyada başlayıb və böyük uğur qazanaraq qlobal səviyyədə tətbiq olunub. Kampaniyanın əsas məqsədi şəxsi və emosional bağ yaratmaq idi. "Share a Coke" kampaniyasında klassik “Coca-Cola” loqosu şüşələrdən çıxarılaraq, onun əvəzinə müxtəlif insanların adları yazılan etiketlər əlavə olunub.
Kampaniya zamanı istifadəçilər “Coca-Cola” saytına girərək öz adlarını yazıb fərdiləşdirilmiş şüşə sifariş edə bilirdilər. Adlarını “Coca-Cola” şüşəsində görən insanlar bu anı sosial mediada da paylaşmağa başladılar. Kampaniya o qədər uğurlu oldu ki, 70- dən çox ölkədə həyata keçirildi. Bununla da brend müştəri ilə daha güclü bağ qurdu və satışlarını artırdı.
Red Bull – "Stratos"
“Red Bull” özünü sıradan enerji içkisi brendi kimi deyil, ekstremal idman və macəra ilə əlaqələndirən bir markaya çevirməyi bacarıb. 2012-ci ildə Avstraliyalı ekstremal idmançı Feliks Baumqartnerin kosmosdan sərbəst düşüşünü izləmək, Red Bull üçün bir dönüm nöqtəsi oldu.
Kampaniya “Red Bull” un “qanad verir” şüarını möhtəşəm şəkildə gerçəkləşdirdi. Bu, yalnız bir marketinq tədbiri deyil, həm də bir dünya rekordudur. "Red Bull" hər addımında qeyri-adi və "daha böyük" düşünərək, öz markasını təcrübə ilə birləşdirir. Bu cür reklamlar, insanlar tərəfindən "epik" olaraq qəbul edilir və sosial mediada sürətlə yayılarak, markanın sədaqətli müştərilərini artırır.
“IKEA” – "Play with Your Food"
“IKEA” özünün ənənəvi mebel reklamlarından fərqli olaraq, insanların həyatını asanlaşdıran məhsullarını daha maraqlı şəkildə təqdim edir. Onlar, 2013-cü ildə “Play with Your Food” kampaniyasını həyata keçirdi. "IKEA" mebel və qida məhsullarını bir araya gətirərək, insanlar üçün qeyri-adi bir təcrübə yaratdı. Bu, brendin həm yaradıcılığını, həm də müştəriləri ilə birbaşa əlaqə qurma qabiliyyətini nümayiş etdirdi. "IKEA" nın kreativ marketinq yanaşması müştərilərin brendə olan marağını artırdı və məhsullarını gündəlik həyatlarında daha çox hiss etmələrinə səbəb oldu.
“Nike” – "Just Do It"
“Nike” ın guerrilla marketinqi sadəcə reklamlarla məhdudlaşdırmır. Onlar, öz müştərilərini motivasiya etmək və onlara ilham vermək üçün hərəkətə keçirlər. “Just Do It” şüarı altında təşkil etdikləri qeyri-adi tədbirlər və aksiyalar, hətta idmançılar və məşhurlar tərəfindən dəstəklənərək geniş yayılır. “Nike” in sosial məsuliyyət sahəsindəki layihələri, marka ilə müştərilər arasında emosional əlaqə qurur. Marka reklamlarında güclü hekayələr yaratmaqla, məhsul satmaqdan daha çox, bir həyat tərzi təqdim edir.
Volkswagen – "The Fun Theory"
“Volkswagen” əyləncəli və yaradıcı bir yanaşma ilə gündəlik həyatın monotonluğundan çıxmağı bacaran kampaniyalarla diqqət çəkib. 2009-cu ildə İsveçdə “The Fun Theory” layihəsini həyata keçirərək, sadə gündəlik fəaliyyətləri əyləncəli hala gətiriblər. Beləki, bir pilləkənləri musiqi pilləkənlərinə çevirərək daha çox insanların bu pilləkənlərdən istifadə etmələrini təmin etdilər.
İnsanlar pilləkənlərlə çıxarkən hər addımda musiqi səsləri eşidirdilər. Nəticədə, eskalatordan istifadə edənlərin sayı azaldı. Böyük ictimai maraq qazanan kampaniya internetdə sürətlə yayıldı və böyük izləyici kütləsi topladı. Nəticədə kampaniya “Volkswagen” brendinə müsbət imic qatdı.
Maya Hüseynova
