Rusiyada 8 və 13 yaşlarındakı iki uşağa toy edilib.
Demokratikmusavat.com Rusiya KİV-ə istinadla xəbər verir ki, toy mərasimi Həştərxan vilayətində baş tutub.
8 yaşlı oğlan və 13 yaşlı qızın toy rəqsi sosial şəbəkələrdə paylaşılıb.
Görüntülərdə uşaqların aralarındakı boy fərqinə görə rəqs etməkdə çətinlik çəkməsi, ətrafdakı rəngarəng işıqlar və s. diqqəti cəlb edib.
Yerli medianın yazdığına görə, toy edilən uşaqlar qaraçılardır və toyu qızın anası təşkil edib.
Rusiya Dövlət Dumasının Ailəni Müdafiə Komitəsinin rəhbəri Nina Ostanina hadisəyə sərt reaksiya göstərib:
"Rusiya vətəndaşı olan hər kəs ölkə qanunlarına əməl etməlidir. Qaraçı olmayan ailələri uşaq istismarına görə cəzalandırdığımız halda biz bu vəziyyətə göz yuma bilmərik".
Səlahiyyətlilər hadisə ilə bağlı araşdırmalara başlayıb.
Qeyd edək ki, Rusiyada nikah üçün minimum yaş həddi 18-dir. 16 yaşlı yeniyetmələrə yalnız xüsusi hallarda yerli hakimiyyət orqanlarının icazəsi ilə evlənməyə icazə verilir.
Billurə Yunus
