ABŞ prezidenti Donald Tramp sosial media hesabından verdiyi açıqlamada Rusiyanın Ukraynaya qarşı müharibəsinə son qoymaq üçün razılaşma əldə olunmasa, Moskvaya qarşı daha sərt sanksiyalar və idxala gömrük rüsumları tətbiq edəcəyi ilə hədələyib.
Marja.az xəbər verir ki, Tramp özünün “Truth Social” sosial media platformasında dərc etdiyi açıqlamasında Rusiya prezidenti Vladimir Putini adı ilə çağırıb.
O, açıqlamasında, "Əgər tezliklə razılaşma əldə olunmasa, Rusiyanın ABŞ və digər ölkələrə satdığı hər şeyə ağır tariflər və sanksiyalar tətbiq etməkdən başqa yolum qalmayacaq. Mənim prezidentliyim dövründə bu müharibə heç vaxt başlamazdı. İndi bu müharibəni bitirək, daha çox itki olmamalıdır", - bildirib.
“Mən Rusiya xalqını sevirəm,Putinlə həmişə yaxşı münasibətim olub, amma...”
Tramp açıqlamasında iqtisadi sanksiyalar tətbiq etməyə hazır olduğuna işarə edərkən, keçmişdə Rusiya ilə qurduğu yaxşı münasibətləri də vurğulayıb. “Mən Rusiyaya zərər vermək istəmirəm. Rus xalqını sevirəm və prezident Putinlə həmişə yaxşı münasibətim olub” deyən Tramp, ABŞ-ın müttəfiqlərinə qarşı tətbiq etdiyi iqtisadi təzyiq üsullarını Rusiya üçün də istifadə edə biləcəyini qeyd edib.
İkinci Dünya Müharibəsi zamanı Rusiyanın oynadığı mühüm rola toxunan Tramp, "Unutmamalıyıq ki, Rusiya müharibə zamanı 60 milyon itki verib və qələbəmizə töhfə verib. Ancaq hazırda çökməkdə olan iqtisadiyyatına baxmayaraq, mən Rusiyaya böyük bir xeyir verəcəm. İndi kompromis vaxtıdır. Bu mənasız müharibəni dayandırın", deyib.
