Fransanın “Olimpik” (Marsel) klubunun hücumçusu Elye Vahi bundan sonra Frankfurt “Ayntraxt”ının uğurları üçün çalışacaq.
Arena.az bu barədə Almaniya klubunun rəsmi saytına istinadən xəbər verir.
Bundesliqa klubu bu transfer üçün Liqa 1 təmsilçisinə 26 miylon avro ödəyib. 22 yaşlı futbolçu ilə müqavilənin müddəti 2030-cu ilin 30 iyununadək nəzərdə tutulub.
Elye Vahi Fransanın “Monpelye” klubunun yetirməsidir. O, 2023-cü ilin avqust ayında 30 milyon avro qarşılığında “Monpelye”dən “Lans”a keçib. Marsel “Olimpik”i isə Vahini 2024-cü ilin avqustunda “Lans”dan 26 milyon avroya transfer etmişdi. 22 yaşlı hücumçu Marsel təmsilçisinin heyətində 14 oyuna çıxıb, 3 qol və 1 assistlə yadda qalıb.
Vahi Fransanın U-16, U-17, U-19, U-20, U-21 və U-23 yığmalarında forma geyinsə də, hələlik, əsas millidə debüt şansı qazanmayıb.
Marsel “Olimpik”inin sol vingeri Entso Sternalı isə “Anderlext”ə satıb. Liqa 1 təmsilçisi bu satışdan 500 min avro qazanıb. 17 yaşlı futbolçu Belçika klubu ilə 2027-ci 30 iyununadək anlaşıb.
“Nansi”nin yetirməsi olan Sternal 2022-ci ildən “Olimpik”in sıralarında idi. O, Marsel klubunun əsas komandasında 2 oyuna çıxıb, fərqlənə bilməyib. Enso Fransanın U-16, U-17 və U-18 yığmalarında da oynayıb.
Elye Vahini heyətinə qatmış “Ayntraxt” da sol vingeri Farid Alidu ilə yollarını ayırıb. 23 yaşlı almaniyalı futbolçu “Kayzerslautern”ə keçib.
Farid Alidu “Hamburq”un yetirməsidir. 2022-ci ildən “Ayntraxt”da çıxış edən alman vinger bu klubun əsas komandasında 21 oyuna çıxıb, 1 qol və 1 assistlə yadda qalıb. Alidu ötən mövsüm “Köln”də, bu mövsümün ilk yarısında isə “Verona”da icarədə olub. O, Almaniyanın U-20 və U-21 yığmalarında da oynayıb.
