Abşeron rayonu, Məmmədli qəsəbəsi, Mənsur Şirinov küçəsində yaşayan sakinlərin illərdir istifadə etdikləri yol bağlanıb. Hazırda onlar məcburiyyətdən mərkəzə getmək üçün uzun yol qət etməli olurlar.
Xezerxeber.az-ın məlumatına görə, onlar iddia edirlər ki, hər gün yüzlərlə adamın gəlib-getdiyi yol 10 gündən çoxdur, bağlanıb. Buna səbəb isə həmin ərazinin yerli bələdiyyə tərəfindən satılmasıdır. İndi sözügedən yola qum tökülüb, ətrafı isə çəpərlənir.
Yolun bağlanması ərazidə yaşayan yüzlərlə sakinin işini çətinləşdirib. İndi onlar məktəbə, marketə, işə, idarəyə getmək üçün xeyli yol qət edirlər.
Məsələ ilə bağlı Məmmədli kənd bələdiyyəsindən bildirildi ki, sakinlərin şikayətinin heç bir əsası yoxdur və orada yolun bağlanmasından söhbət gedə bilməz. “Həmin ərazi fərdi şəxsə məxsusdur və əlində xüsusi mülkiyyəti var. Həmin şəxs 5 il müddətində kənddə yaşamayıb. İndi qayıdıb və öz ərazisinə sahib çıxıb. Yəni ərazidə qanunsuz heç bir iş aparılmayıb. Bağlandığı iddia edilən ərazi isə ümumiyyətlə yol deyil, xüsusi mülkiyyətidir”,- deyə bələdiyyədən bildirildi. Alternativ yolun açılıb-açılmayacağı ilə bağlı suallarımız isə cavabsız qaldı.
Xezerxeber.az mövzu ilə bağlı daha ətraflı videomaterialı təqdim edir.
