“Barselona”nın baş məşqçisi Hans-Diter Flik Markus Raşfordun “Barselona”ya mümkün keçidi haqda sualı cavablayıb.
Arena.az xatırladır ki, mətbuatda, “Mançester Yunayted”in hücumçusunun cari qış transfer pəncərəsində “Barselona”ya keçə biləcəyi haqda xəbərlər dolaşır.
“Raşford? Mən həmişə komandadan razı olduğumu deyirəm. Hazırda cəmi üç zədəli futbolçumuz var və biz tibbi heyətdən asılı olmayaraq işləyirik. Bu, Dekudan asılıdır, amma mən heyətdən razıyam”, deyə Flik vurğulayıb.
Markus Raşford “Mançester Yunayted”in yetirməsidir. İngilis futbolçu 2016-cı ilin yanvarından “qırmızı şeytanlar”ın əsas komandasında çıxış edir. Raşfordun “Mançester Yunayted”lə müqaviləsinin müddəti 2028-ci ilin iyun ayının sonuna qədər qüvvədədir.
Raşford cari mövsümdə “qırmızı şeytanlar” üçün bütün yarışlarda 24 oyun keçirib, 7 qol və 3 məhsudlar ötürmə ilə fərqlənib.
Markusun “Mançester Yunayted”in heyətində çıxışının ümumi mənzərəsi isə 426 oyun, 138 qol və 63 məhsuldar ötürmədən ibarətdir.
İngilis hücumçu “Mançester Yunayted”lə Avropa Liqasının (2016/2017), İngiltərə Kubokunun (2016, 2024), İngiltərə Liqa Kubokunun (2017, 2023), İngiltərə Super Kubokunun (2016/2017) qalibi olub. Raşford 2019/2020-ci və 2022/2023-cü illər mövsümlərində “Mançester Yunayted”də ilin futbolçusu seçilib.
Raşford 2016-cı ilin may ayında debüt etdiyi İngiltərə yığma komandasının heyətində 60 oyuna, 17 qol vurub və 6 məhsuldar ötürmə verib.
“Transfermarkt” internet-portalı 27 yaşlı ingiltərəli sol cinah hücumçusunun transfer dəyərini 55 milyon avro məbləğində qiymətləndirir.
