Şimali Makedoniyanın “Brera” klubunun müdafiəçisi Kauan Alexandre Martins de Paula bundan sonra “Turan Tovuz”un formasını geyinəcək.
Arena.az bu barədə Tovuz klubunun mətbuat xidmətinə istinadən xəbər verir.
Braziliyadan olan 24 yaşlı futbolçu “Turan Tovuz”a azad agent kimi qoşulub. Mərkəz müdafiəçi Tovuz təmsilçisi ilə 6 ay + 1 illik müqaviləyə imza atıb.
Kauan Alexandre Martins de Paula karyerasına vətənində “Pirasikaba” klubunda başlayıb. O, Braziliyanın “Korintians”, “Mariliya” və “Anapolis” klublarının da formasını geyinib. Estoniyada “Trans Narva” klubunun da şərəfini qorumuş müdafiəçi 2024-cü ilin yanvarından “Brera”da çıxış edirdi. O, bu komandanın heyətində meydana çıxdığı 30 oyunda məhsuldarlıq nümayiş etdirə bilməyib.
Xatırladaq ki, “Turan Tovuz” daha öncə Rəhim Sadıxov (“Sumqayıt”), Anton Kraçkovski (“Dinamo”, Mahaçqala, Rusiya) və Orxan Əliyevi (“Kəpəz”) də heyətinə qatmışdı.
