Tramp Baydenin 78 qərarını ləğv edib
ABŞ prezidenti Donald Tramp stadionda tərəfdarları qarşısında çıxış edərək, ölkə siyasətində əsaslı dəyişiklikləri nəzərdə tutan 9 sənəd imzalayıb. AzPost xəbər verir ki, tədbir ABC kanalı tərəfindən YouTube-da yayımlanıb.
İmzalanan qərarlar arasında əvvəlki Co Bayden administrasiyası tərəfindən qəbul edilmiş 78 fərman və memorandumun ləğvi də olub. Bundan əlavə, hökumətin tam nəzarətinə qədər federal idarələr tərəfindən yeni qaydaların qəbul edilməsinə məhdudiyyət qoyulub.
Prezident həmçinin hərbçilər və bir sıra digər kateqoriyalı işçilər istisna olmaqla, dövlət qulluğuna qəbulun dondurulması barədə göstəriş verib.
Sərəncamlardan biri bütün federal işçilərə dərhal uzaqdan işləməyi dayandırmağı və ofislərinə qayıtmağı əmr edir. Tramp həmçinin dövlət qurumlarına ölkədə artan yaşayış bahalaşması probleminin həllinə diqqət yetirməyi tapşırıb. ABŞ-ın Paris İqlim Sazişindən çıxması ilə bağlı rəsmi qərar BMT-yə göndərilən ayrıca məktubda da təsdiqlənmiş mühüm addım olub.
Tramp həmçinin söz azadlığının bərpasına və federal strukturlarda senzuranın ləğvinə yönəlmiş sənəd imzalayıb. Məhkəmə sistemindən əvvəlki administrasiyanın əleyhdarlarına qarşı siyasi mübarizə vasitəsi kimi istifadəsini qadağan edib.
Çıxışını yekunlaşdıran dövlət başçısı tərəfdarlarına minnətdarlığını bildirib və onları tezliklə mühüm müsbət dəyişikliklərin şahidi olacaqlarına əmin edib.
Xatırladaq ki, Donald Tramp rəsmi olaraq yanvarın 20-də ABŞ prezidenti vəzifəsinin icrasına başlayıb.
Trampın imzaladığı ilk sənədlərdən biri kabinetin 22 üzvünün tərkibini və oxşar səviyyəli vəzifələri təsdiqləyib. Digər sənəd isə 47 nazir müavini və yüksək vəzifəli şəxslərin təyinatı ilə bağlı olub.
