Bu gün keçirilmiş bir oyunla Azərbaycan Basketbol Liqasında (ABL) 2024/2025-ci illər mövsümünün 12-ci turuna start verilib
Arena.az xəbər verir ki, ilk oyun günündə bir qarşılaşma baş tutub.
Turun açılış oyununda A qrupunda yer almış “Sərhədçi” və “Abşeron” komandaları üz-üzə gəliblər. “Sərhədçi” İdman Mərkəzində keçirilmiş oyun qonaq komandanın üstünlüyü ilə keçib. “Sərhədçi” yalnız 3-cü dövrədə rəqibindən güclü ola bilib. Yekunda “Abşeron” mövsümdə 5-ci qələbəsini qazanıb.
12-ci tura yanvarın 26-da yekun vurulacaq.
Azərbaycan Basketbol Liqası
A qrupu, 12-ci tur
21 yanvar
“Sərhədçi” – “Abşeron” 79:86 (18:20, 22:24, 22:19, 17:23)
“Sərhədçi” İdman Mərkəzi.
Xallar: Sabah – 20. Naxçıvan – 19. Sərhədçi – 17. Abşeron – 17. Neftçi – 16. NTD – 13.
Qeyd edək ki, cari mövsümün reqlamentə əsasən, çempionatın oyunları dörd dövrəli 20 turdan ibarət sistem üzrə keçiriləcək. Müntəzəm mövsümdə A qrupunu ilk 3 sırada tamamlamış klublarla B qrupunu lider bitirmiş komanda pley-offun 1/4 final mərhələsinə vəsiqə qazanacaqlar. A və B qruplarında digər yerləri tutmuş komandalar isə pley-offun 1/8 final mərhələsində üz-üzə gələcəklər. 1/8 finalda ən tez iki qələbə qazanmış klublar 1/4 finala vəsiqə qazanacaqlar. Həm 1/4 final, həm də yarımfinal seriyaları 2 qələbəyə qədər davam edəcək. Final seriyasında isə ən tez 4 qələbə qazanmış komanda Azərbaycan Basketbol Liqasının çempionu olacaq.
Klubların pley-off mərhələsində göstərdikləri uğurlu və ya uğursuz nəticələrə əsasən, növbəti mövsümdən hansı klubların A qrupunda, hansı klubların isə B qrupunda iştirak edəcəyi müəyyənləşəcək.
