Məşhur britaniyalı jurnalist Piers Morqan "Əl-Nəsr"in hücumçusu Kriştiano Ronaldo ilə söhbətindən xatirələrini bölüşüb.
İdman.biz xəbər verir ki, bu barədə "Give me Sport" yazıb.
Kriştiano ilə maraqlı söhbət etdiklərini deyən Morqan sözlərinə belə davam edib: "Üç il əvvəl ondan ilk dəfə müsahibə alandan sonra nahar etdik. Həqiqətən əla söhbət alındı və onu bir insan kimi çox bəyənirəm".
Jurnalist portuqaliyalı futbolçunun Lionel Messiyə inanılmaz dərəcədə hörmətlə yanaşdığını vurğulayıb: "Ondan soruşdum: "İndiyə qədər gördüyün ən yaxşı oyunçu kimdir?" Belə cavab verdi: "Messi, amma səhv sual verirsən, məndən ən yaxşı oyunçunun kim olduğunu soruşma..." Bu məni güldürdü.
Ancaq sonra o, ikisi, həmçinin onlarla Ronaldo Nazario, Ronaldinyo, Corc Best, Pol Qaskoyn kimi bir çox digər böyük oyunçular arasındakı fərqdən danışdı. Dedi ki, fərq onunla Messinin daha uzun karyeraya malik olmalarındadır".
Morqanın fikrincə, Kriştiano Ronaldo və Messi arasındakı rəqabət idmanda ən yaxşı rəqabətlərdən biridir: "Onlar artıq 18 və ya 19 ildir zirvədədirlər və bu onların hədsiz fədakarlığı, əla fiziki hazırlığı və şübhəsiz ki, bir-birini daha da yüksək səviyyəyə daşıyan rəqabət sayəsindədir. Onların mübarizəsini gördüyümüz üçün çox şanslıyıq”.
İdman.biz
