Donald Tramp qayıdışından sonra “diet kola” sifariş düyməsini ABŞ prezidentinin Ağ Evdəki ofisinə (Oval ofisə) qaytarıb.
Yeniavaz.com xəbər verir ki, bu barədə “The Wall Street Journal” (WSJ) qəzeti məlumat yayıb.
Düymə Tramp tərəfindən əvvəlki səlahiyyət müddətində quraşdırılıb, lakin Co Baydenin prezidentliyi dövründə çıxarılıb.
Qəzetin yazdığına görə, Trampın qayıdışı ilə Oval kabinetdə kamin üzərində yeni gümüş qartal heykəlcikləri peyda olub və onun yanındakı stolun üzərinə yenidən Böyük Britaniyanın baş naziri Uinston Çörçilin büstü qoyulub. Heykəl Trampın ilk prezidentlik dövründə orada olub, lakin Bayden onu ofisindən çıxarmaq qərarına gəlib.
Dörd il əvvəl olduğu kimi, kamin üzərində ABŞ-nin ilk prezidenti Corc Vaşinqtonun portreti asılıb, onun yanında isə ölkənin birinci maliyyə naziri Aleksandr Hamilton və ölkənin üçüncü prezidenti Tomas Ceffersonun portretləri yerləşdirilib.
WSJ qeyd edir ki, Oval Ofis Ağ Evdə ABŞ Prezidentinin böyüklüyünü və gücünü dünyaya nümayiş etdirmək üçün nəzərdə tutulmuş ən simvolik yerdir. Yeni prezident vəzifəyə gələndə, administrasiyasının məqsədlərini vurğulayan materiallar əlavə edərək, kabinetlərini yenidən təşkil edirlər.
Hakimiyyətin keçidi zamanı Oval kabinetin yenidən dizaynı bir neçə saat ərzində baş verir.
Qəzet vurğulayır ki, bu dəfə proses Co Bayden hələ binada olarkən baş verib.
