Ukraynanın “Şaxtyor” (Donetsk) klubunun hücumçusu Danilo Sikan bundan sonra “Trabzonspor”un uğurları üçün çalışacaq.
Arena.az xəbər verir ki, bu barədə Türkiyə klubunun rəsmi saytı məlumat yayıb.
Super Liqa təmsilçisi bu transferi 6 milyon avroya rəsmiləşdirib. Ukrayna millisinin də üzvü olan 23 yaşlı forvard “Trabzonspor”la müddəti 2029-cu ilin 30 iyununa qədər nəzərdə tutulmuş müqaviləyə imza atıb.
Danilo Sikan Ukraynanın “Karpatı” (Lvov) klubunun yetirməsidir. O, 2019-cu ildə məhz bu klubdan Donetsk “Şaxtyor”una keçib. Donetsk təmsilçisi gənc hücumçusunu vaxtilə “Mariupol” və “Hanza Rostok” kimi klublara icarəyə də verib. Danilo “Şaxtyor”un heyətində meydana çıxdığı 115 oyunda 31 qol vurub, 9 məhsuldar ötürmə müəllifi olub.
Danilo Sikanın bütün uğurları da məhz “Şaxtyor”la bağlıdır. O, Donetsk klubu ilə 3 dəfə (2019/2020, 2022/2023, 2023/2024) Ukrayna çempionu olub, bir dəfə (2023/2024) Ukrayna Kubokunu, bir dəfə də Ukrayna Super Kubokunu (2021/2022) qazanıb. Danilo Ukraynanın U-20 yığması ilə də 2019-cu ildə dünya çempionu olub.
Ukraynalı futbolçu ölkəsinin U-19, U-20, U-21, U-23 və Olimpiya yığmalarında oynayıb, 2021-ci ilin sentyabr ayında isə əsas millidə debüt edib. 23 yaşlı forvard Ukrayna yığmasının heyətində meydana çıxdığı 7 oyunda 1 qol vurub.
Yeri gəlmişkən, ötən ay “Trabzonspor”dan ayrılan xorvatiyalı sol vinger Mislav Orşiçin yeni iş yeri müəyyənləşib. O, azad agent kimi Kiprin “Pafos” klubuna keçib. 32 yaşlı futbolçunun yeni klubu ilə müqaviləsinin müddəti açıqlanmır.
Xatırladaq ki, “Trabzonspor” Mislav Orşiçi 2023-cü ilin iyul ayında İngiltərənin “Sauthempton” klubundan transfer etmişdi. Türkiyə klubu bu transferə görə “Sauthempton”a 2,4 milyon avro ödəmişdi. Xorvat futbolçu “Trabzonspor”da cəmi 16 oyuna çıxıb. Bu görüşərdə cəmi 1 məhsuldar ötürməsi olan futbolçu zədə səbəbindən uzun müddət idi komandaya kömək edə biləyib.
Orşiç daha öncə “Sauthempton”, “Dinamo” (Zaqreb), “İnker”, “Ulsan Hyundai”, “Jeonnam Draqons”, “Çelye”, “Çanqçun Yatay”, “Spetsiya” kimi klubların da formasını geyinib. O, Xorvatiya milli komandasında keçirdiyi 27 oyunda 2 qolla yadda qalıb.
