Almaniyanın “Hoffenhaym” klubunun mərkəz yarımmüdafiəçisi Tom Bişof Bundesliqa nəhəngi “Bayern”lə müqavilə bağlayıb.
Arena.az bu barədə Münhen təmsilçisinin rəsmi saytına istinadən xəbər verir.
“Bayern” 19 yaşlı futbolçunun transferini pulsuz həyata keçirib. Belə ki, yarımmüdafiəçinin “Hoffenhaym”la müqaviləsinin müddəti bu mövsümün sonunda bitir. Bu üzdən də “Bayern” Tomu azad agent kimi heyətinə qatıb. Bişof yeni “Bayern”lə 2029-cu ilin 30 iyununa qədər sözləşmə imzalasa da, cari mövsümün sonuna qədər “Hoffenhaym”da forma geyinməyə davam edəcək.
Qeyd edək ki, Tom Bişof “Hoffenhaym”ın öz yetirməsidir. O, Almaniyanın ən istedadlı futbolçularından hesab olunur. Tom ölkənin aşağı yaş qruplarından ibarət millilərində (U-16, U-17, U-18, U-19, U-20) çıxış edib.
Bişof “Hoffenhaym”ın əsas komandasında 53 oyun keçirib. Gənc futbolçu bu oyunlarda 2 qol vurub, 5 məhsuldar ötürmə müəllifi olub.
