"Abşeron"a qarşı oyunda biz komanda olaraq böyük bir irəliləyişə nail olduq". SİA xəbər verir ki, NTD komandasının oyunçusu Tayri Boykin klubun mətbuat xidmətinə açıqlama verib.
O bildirib ki, bu oyunda topun meydançada necə hərəkət etdiyini görə bilərsiz: "Oyundan zövq alırdıq. Belə oynadığınız zaman, qələbələr də gəlir. Biz məşqlərdə çox çalışırıq. Və komanda kimi birlikdə inkişaf etməyə davam edəcəyik. İnanıram ki, qarşıda bizi böyük uğurlar gözləyir. Növbəti rəqibimiz "Naxçıvan"dır. Məşqçilər oyuna bizi çox yaxşı hazırlayıblar. Biz bilirik ki, "Naxçıvan" güclü klubdur və yaxşı oyunçuları var. Bizim üçün prioritet güclü tərəflərimizdən istifadə etməkdir. Bu halda biz hər bir komandaya qarşı rəqabət apara bilərik. Məşq həftəsi çox yaxşı keçdi".
Boykinin sözlərinə görə, NTD-yə keçidi çox tez baş verib: "Məşqçilər menecerimlə əlaqə saxladı və biz demək olar ki, dərhal qərar verdik. Klubun mənə güvəndiyinə və bu imkanı verdiyinə görə minnətdaram. NTD böyük tarixə malik güclü bir klubdur. Komandanın əvvəlki nəticələrini yenidən göstərməsi üçün əlimdən gələni edəcəm. Biz başa düşürük ki, mövsümün ilk yarısı gözlədiyimiz kimi keçmədi. Amma biz bunu artıq arxada qoymuşuq. Komandanın heyəti yenilənib. Oyunçular bir-birini yaxşı başa düşməyə başlayıblar. Məşqçilər yeni oyunçuların komandanın oyun üslubuna tez uyğunlaşması üçün böyük iş görüblər. Biz qələbələr üçün hazırlaşırıq. Dediyim kimi, mənim məqsədim komandanın uğur qazanması üçün lazım olan hər şeyi etməkdir. Hər dəfə meydançaya çıxdığda 110% bacarığımı ortaya qoyuram. Komandamda mənim kimi eyni səylə oynayan oyunçularla oynamaq böyük xoşbəxtlikdir. Biz bir-birimiz, ailələrimiz və azarkeşlərimiz üçün ən yaxşı oyunu nümayiş etdirmək üçün çox çalışırıq".
