Oyun böhranı mənzərəsində uğursuz nəticələrindən boğulan İngiltərə nəhəngi “Mançester Yunayted”in düşərgəsindən növbəti bəd xəbər gəlib.
Arena.az “Guardian” dərgisinə istinadən məlumat verir ki, “qırmızı şeytanlar”ın portuqal baş məşqçisi Ruben Amorimlə klubun məzunu, ingiltərəli hücumçu Markus Raşford arasında münasibətlər pozulub.
Bildirilir ki, Amorim Raşfordu öz oyun planlarına müvafiq hesab etmir. İş o yerə çatıb ki, tərəflər arasında şəxsi münasiblətlər pozulub. Baş məşqçi ilə futbolçu arasında ünsiyyət belə yoxdur, onlar sadəcə olaraq danışmırlar. Amorim Raşforda ancaq komanda ilə ümumi toplantılar zamanı müraciət edir, tərəflər arasında ancaq bu halda söhbət baş tutur.
Xatırladaq ki, Amorim dikbaşlığı ilə seçilən Raşfordu ara-sıra ehtiyatda “çürüdür”. Mançester klubunun məzununun “qırmızı şeytanlar”ın düşərgəsindən ayrılacağı haqda şayiələr bitib-tükənmir. Raşfordun “Barselona”ya icarəyə yollanacağı haqda söz-söhbət gəzir.
Markus Raşford “Mançester Yunayted”in yetirməsidir. İngilis futbolçu 2016-cı ilin yanvarından “qırmızı şeytanlar”ın əsas komandasında çıxış edir. Raşfordun bu klubla müqaviləsinin müddəti 2028-ci ilin iyun ayının sonuna qədər qüvvədədir.
Raşford cari mövsümdə “qırmızı şeytanlar” üçün bütün yarışlarda 24 oyun keçirib, 7 qol və 3 məhsudlar ötürmə ilə fərqlənib.
Markusun “Mançester Yunayted”in heyətində çıxışının ümumi mənzərəsi isə 426 oyun, 138 qol və 63 məhsuldar ötürmədən ibarətdir.
İngilis hücumçu “Mançester Yunayted”lə Avropa Liqasının (2016/2017), İngiltərə Kubokunun (2016, 2024), İngiltərə Liqa Kubokunun (2017, 2023), İngiltərə Super Kubokunun (2016/2017) qalibi olub. Raşford 2019/2020-ci və 2022/2023-cü illər mövsümlərində “Mançester Yunayted”də ilin futbolçusu seçilib.
Raşford 2016-cı ilin may ayında debüt etdiyi İngiltərə yığma komandasının heyətində 60 oyuna, 17 qol vurub və 6 məhsuldar ötürmə verib.
“Transfermarkt” internet-portalı 27 yaşlı ingiltərəli sol cinah hücumçusunun transfer dəyərini 55 milyon avro məbləğində qiymətləndirir.
