Türkiyənin “Sivasspor” klubu heyətini iki yeni futbolçu – yarımmüdafiəçilər Efkan Bekiroğlu və Tolqa Cigerci ilə gücləndirib.
Arena.az xəbər verir ki, bu barədə Super Liqa təmsilçisi rəsmi saytı vasitəsilə məlumat yayıb.
Hər iki futbolçu “Ankaragücü” klubundan “Sivasspor”a keçib. Tolqa azad agent kimi qoşulduğu Sivas təmsilçisi ilə 1,5 illik müqaviləyə imza atıb. Efkan isə Ankara təmsilçisindən bu mövsümün sonuna kimi satınalma şərti ilə icarəyə götürülüb.
Efkan Bekiroğlu futbolçu karyerasına “Fürstenfeldbruk” klubunun gənclər akademiyasında başlayıb. O, daha sonra “Unterföhrinq”, “Auqsburq” və “1860 Munhhen”də oynayıb. 2020/2021 mövsümündə Türkiyəyə transfer olan və “Alanyaspor”da oynamağa başlayan Efkan son olaraq 2023-cü ilin yayında “Ankaragücü” klubuna cəlb edilib. 29 yaşlı hücumameyilli yarımmüdafiəçi Ankara təmsilçisinin heyətində meydana çıxdığı 54 oyunda 16 qol vurub, 12 məhsuldar ötürmə müəllifi olub.
10 nömrəli mövqedə çıxış edən oyunçu karyerası ərzində ümumilikdə 326 oyuna çıxıb, 93 qol vurub, 41 məhsuldar ötürmə edib.
“Transfermarkt” internet-portalı 29 yaşlı yarımmüdafiəçinin transfer dəyərini 1,5 milyon avro məbləğində qiymətləndirir.
Tolqa Cigerci isə futbolçu karyerasına Almaniyanın “Volfsburq” klubunun gənclər akademiyasında başlayıb. “Borussiya” (Mönhenqladbax), “Herta” (Berlin), “Qalatasaray”, “Fənərbaxça” və “Başakşəhər”də çıxış etmiş təcrübəli futbolçu son olaraq “Ankaragücü” klubunda çıxış edib. O, Ankara təmsilçisinin heyətində meydana çıxdığı 59 oyunda 11 qol vurub, 7 məhsuldar ötürmə müəllifi olub.
Dayaq yarımmüdafiəçisi mövqeyində çıxış edən 32 yaşlı futbolçu karyerası ərzində ümumilikdə 362 oyuna çıxıb, 40 qol vurub, 23 məhsuldar ötürmə edib. Tolqa 4 dəfə Türkiyə milli komandasının da formasını geyinib.
“Transfermarkt” internet-portalı 32 yaşlı yarımmüdafiəçinin transfer dəyərini 300 min avro məbləğində qiymətləndirir.
