2024-cü ilin yayında “Everton”dan ayrılandan bəri işsiz olan İngiltərə millisinin sabiq üzvü Dele Alli karyerasını “Komo”da davam etdirəcək.
Arena.az xəbər verir ki, bu barədə İtaliya klubu rəsmi saytı vasitəsilə məlumat yayıb.
28 yaşlı ingilis futbolçu yeni klubu ilə 2026-cı ilin yayına qədər nəzərdə tutulmuş müqaviləyə imza atıb.
Xatırladaq ki, Dele Alli peşəkar karyerasına “Milton Kins Dons” komandasında başlayıb. O, 2015-ci ildə məhz bu klubdan “Tottenhem”ə transfer olub. London təmsilçisində 269 oyuna 67 qol vurmuş futbolçu, 2022-ci ilin yanvarında azad agent kimi “Everton”a cəlb olunub. O, bu komandada cəmi 13 oyuna çıxsa da, fərqlənə bilməyib. 2022/2023-cü illər mövsümündə Türkiyənin “Beşiktaş” klubunda icarədə olan ingilis futbolçu İstanbul təmsilçisinin heyətində 15 oyuna 3 qolla yadda qalıb. 2024-cü ilin yayında isə “Everton” Alli ilə müqaviləyə xitam verildiyini rəsmən açıqlayıb. Həmin dövrdən bəri ingilis futbolçu azad agent kimi özünə yeni iş yeri axtarırdı.
28 yaşlı futbolçu 2015-ci ilin oktyabr ayında debüt etdiyi İngiltərə yığmasında 37 oyuna çıxıb. O, bu oyunlarda 3 qola imza atıb, 7 məhsuldar ötürmə müəllifi olub.
“Transfermarkt” internet portalı 28 yaşlı Dele Allinin transfer dəyərini 3,5 milyon avro məbləğində qiymətləndirir.
Yeri gəlmişkən, “Komo”nun mərkəz müdafiəçisi Federiko Barba da bu klubdan ayrılaraq İsveçrə təmsilçisi “Sion”a keçib. 31 yaşlı italyan futbolçu yeni klubu ilə 2027-ci ilin 30 iyununadək anlaşıb. Transferin digər detalları açıqlanmır.
Federiko Barba “Roma”nın yetirməsidir. “Qrosseto”, “Empoli”, “Ştutqart”, “Sportinq” (Xixon), “Kyevo”, “Valyadolid”, “Benevento”, “Piza” kimi klublarda da çıxış etmiş Barba “Komo”ya 2023-cü ilin avqustunda 600 min avro müqabilində qoşulmuşdu. Müdafiəçi bu klubun heyətində 41 oyuna çıxıb, 3 qola imza atıb.
İtaliyanın U-19, U-20 və U-21 yığmalarında da oynamış Barbaya əsas millidə ehtiyac duyulmayıb.
“Transfermarkt” internet portalı 31 yaşlı Barbanın transfer dəyərini 1 milyon avro məbləğində qiymətləndirir.
