ABŞ-nin yeni prezidenti Donald Tramp bəlkə də Rusiya-Ukrayna müharibəsini 24 saat ərzində bitirmək vədindən imtina edib, lakin onun xüsusi nümayəndəsi Kit Kelloqa savaşı 100 gün ərzində başa çatdırmaqla bağlı tapşırıq verməsi müharibənin dondurulmuş münaqişəyə çevrilməsi riskini artırır.
Hurriyyet.az xəbər verir ki, bu barədə "The Times" yazıb.
Nəşr qeyd edib ki, dondurulmuş münaqişələrin tarixi şanslı olmayıb - silahlı qarşıdurma təhlükəsi aktual olaraq qalır.
Sent-Endryus Universitetinin strateji tədqiqatlar professoru Filips O'Brayenin fikrincə, Ukrayna bu məsələdə şanslı olmalıdır.
"Tramp əslində Ukrayna ilə maraqlanmır. O, müharibəyə son qoyduğuna görə özünü sülhməramlı elan etmək istəyir", - deyə O'Brayen bildirib.
Onun sözlərinə görə, Donald Trampın Rusiyaya qarşı hədələri inandırıcı deyil:
"Tramp Ukraynaya təhlükəsizlik zəmanəti təklif etməyib və özünü vasitəçi kimi göstərir".
Tramp açıq şəkildə bildirib ki, əgər Ukraynada atəşkəs sülhməramlıların iştirakını tələb edirsə, bu məsələ ilə ABŞ və NATO deyil, Avropa məşğul olmalıdır.
Avropa Komissiyasının sədri Ursula fon der Lyayen Davosda keçirilən forumda qəfil atəşkəs təhlükəsindən danışıb:
"Heç kim sülhü Ukrayna xalqından çox istəmir. Lakin onlar ədalətli və davamlı sülh istəyirlər. Onların istəmədikləri sonradan yenidən alovlana biləcək dondurulmuş münaqişədir".
Ukrayna prezidenti Volodimir Zelenski isə bu mövzuda qeyd edib:
"Ukraynalılar bu ssenari ilə çox yaxşı tanışdırlar. Çünki Ukraynanın şərqində dondurulmuş münaqişə var idi. Minsk razılaşmaları isə onun həllinə gətirib çıxarmadı. Biz Rusiya ilə danışmağa çalışdıq. Amma biz onlardan yalandan başqa heç nə eşitmədik. Biz onlara etibar edə bilmərik".
Müasir dövrdə dondurulmuş münaqişənin ən məşhur nümunəsi Koreya müharibəsidir. Koreya yarımadası cəbhə xətti boyunca bölünüb. Şimali və Cənubi Koreya hələ də müharibə vəziyyətindədir.
