“Mançester Siti” braziliyalı mərkəz müdafiəçisi Vitor Reysi “Palmeyras”dan tamhüquqlu əsasda “şəhərlilər”in düşərgəsinə qatıb.
Arena.az bu barədə İngiltərə klubunun mətbuat xidmətinə istinadən məlumat verir.
“Mançester Siti” 19 yaşlı futbolçunun keçidi müqabilində 35 milyon avro məbləğində sabit ödəniş edib, daha 5 milyon avro məbləğində vəsaiti isə əlavə üstəliklərə sərf edib.
Vitor Reys yeni klubu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb.
Reys “şəhərlilər”in heyətində “22” nömrə altında çıxış edəcək.
Vitor Reys “Palmeyras”ın yetirməsidir. Gənc futbolçu böyük futbolda dördüncü mövsümünü keçirir. Bu müddətdə Reys ancaq “Palmeyras”ın uğurları üçün çalışıb, ümumilikdə 38 oyun keçirib, 2 qol vurub.
Vitor Reys Braziliyanın U-16 və U-17 komandalarına cəlb edilib, “selesao”nun əsas komandasına isə hələ dəvət almayıb.
Vitor Reys perspektivli müdafiəçi sayılır. Gənc Vitor böyük futbolda hələ heç bir qənimət qazanmayıb.
“Transfermarkt” internet-portalı 19 yaşlı braziliyalı müdafiəçinin transfer dəyərini 14 milyon avro məbləğində qiymətləndirir.
