“Barselona”nın 17 yaşlı ispaniyalı sağ cinah hücumçusu Lamin Yamalın agenti Jorje Mendeş yeniyetmə futbolçuya tövsiyə verib.
Arena.az “Mundo Deportivo” nəşrinə istinadən məlumat verir ki, məşhur portuqal agent yeniyetmə futbolçuya, dünya futbolunu portuqal əfsanəsi, “Əl-Nəsr”in 39 yaşlı veteran hücumçusu Kristiano Ronaldodan nümunə götürməyi məsləhət görüb:
“Yamal hələ çox gəncdir, amma onu çox böyük gələcək gözləyir və onun ən yüksək səviyyədə uğur qazanmaq və “1” nömrə olmaq üçün hər cür şəraiti var. Düşünürəm ki, əldə etdiyi hər bir xüsusa görə, Kristiano Ronaldo Lamin və bütün gənc oyunçular üçün əla nümunədir. Bu, demək olar ki, heç kimin çatmadığı bir səviyyədir. Bu gün onun minə yaxın qolu var, o, ondan əvvəl heç kimin bacarmadığına nail olub. Qol – hər bir komandanın əsas məqsədidir. Lamin təkcə meydanda deyil, həm də meydandan kənarda Kristianonun karyerasını idarə etməsi timsalında yaxşı nümunəyə malikdir. Onun 40 yaşı var, amma hələ də yarışmağa davam edir. Bu, çox gözəl nümunədir”, deyə Jorje Mendeş vurğulayıb.
Lamin Yamal “Barselona”nın yetirməsidir. İstedadlı yeniyetmə 2022/2023-cü illər mövsümündən Kataloniya təmsilçisinin əsas komandasında çıxış edir. Yamalın “Barselona” ilə müqaviləsinin müddəti 2026-cı ilin iyun ayının sonuna qədər qüvvədədir.
Cari mövsümdə Yamal “blauqrana”nın heyətində bütün yarışlarda 21 oyuna çıxıb, 6 qol və 12 məhsuldar ötürmə ilə fərqlənib.
Lamin Yamalın “Barselona”da çıxışının ümumi mənzərəsi 72 oyun, 13 qol və 21 məhsuldar ötürmədən ibarətdir.
Yamal 2023-cü ilin sentyabrında debüt etdiyi İspaniya yığma komandasının heyətində 17 oyun keçirib, 3 qol vurub, 8 məhsuldar ötürmə verib.
Lamin Yamalın qənimətlər muzeyində “Barselona” ilə 2022/2023-cü illər mövsümündə qazandığı İspaniya La Liqası var. Həmçinin Yamal İspaniya yığması ilə AÇ-2024-ün qalibi olub.
“Transfermarkt” internet-portalı 17 yaşlı ispaniyalı cinah hücumçusunun transfer dəyərini 180 milyon avro məbləğində qiymətləndirir.
