Keçmiş futbolçu Aleksandr Bubnov “Barselona”nın ispaniyalı cinah hücumçusu Lamin Yamalı 2024-cü ildə dünyanın ən yaxşı oyunçusu adlandırıb.
Arena.az rus təhlilçinin bu barədə qənaətini təqdim edir:
“Yamal ağlasığmaz istedaddır! Gənc yaşına rəğmən, oğlancıq, hələ məktəbli ikən dərhal “Barselona” komandasında özünə yer tapdı. Bu il İspaniya yığmasının Avropa Çempionatını qazanmasında böyük rol oynadı”, deyə Bubnov vurğulayıb.
Lamin Yamal “Barselona”nın yetirməsidir. İstedadlı yeniyetmə 2022/2023-cü illər mövsümündən Kataloniya təmsilçisinin əsas komandasında çıxış edir. Yamalın “Barselona” ilə müqaviləsinin müddəti 2026-cı ilin iyun ayının sonuna qədər qüvvədədir.
Cari mövsümdə Yamal “blauqrana”nın heyətində bütün yarışlarda 21 oyuna çıxıb, 6 qol və 12 məhsuldar ötürmə ilə fərqlənib.
Lamin Yamalın “Barselona”da çıxışının ümumi mənzərəsi 72 oyun, 13 qol və 21 məhsuldar ötürmədən ibarətdir.
Yamal 2023-cü ilin sentyabrında debüt etdiyi İspaniya yığma komandasının heyətində 17 oyun keçirib, 3 qol vurub, 8 məhsuldar ötürmə verib.
Lamin Yamalın qənimətlər muzeyində “Barselona” ilə 2022/2023-cü illər mövsümündə qazandığı İspaniya La Liqası var. Həmçinin Yamal İspaniya yığması ilə AÇ-2024-ün qalibi olub.
“Transfermarkt” internet-portalı 17 yaşlı ispaniyalı sağ cinah hücumçusunun transfer dəyərini 180 milyon avro məbləğində qiymətləndirir.
