“Təhsil hər bir cəmiyyətin və dövlətin inkişafının əsas şərtidir. Azərbaycanın gələcəyi bilikli və savadlı gənclərdən asılıdır. Ona görə də təhsil prioritet sahə olaraq daim diqqət mərkəzindədir". - Prezident İlham Əliyev
Bu fikir, ölkədə təhsil sahəsində həyata keçirilən islahatların, eləcə də təhsilin strateji əhəmiyyətinin dövlət səviyyəsində necə qiymətləndirildiyini açıq şəkildə əks etdirir. Hər il yanvarın 24-də qeyd edilən Beynəlxalq Təhsil Günü, təhsilin insan həyatında və cəmiyyətin inkişafında oynadığı əsas rolu bir daha xatırlatmaq məqsədi daşıyır. BMT-nin Baş Assambleyası tərəfindən təsis edilən bu gün, hər bir fərdin təhsil hüququnun qorunmasının və dünya miqyasında təhsil sistemlərinin inkişaf etdirilməsinin vacibliyini ön plana çəkir.
Təhsil insan hüquqlarının əsas sütunlarından biridir. Dünyada milyonlarla insan hələ də keyfiyyətli təhsil almaqdan məhrumdur. BMT-nin hesablamalarına görə, 244 milyon uşaq və gənc məktəbə getmir, 771 milyon yetkin isə savadlılıq bacarığından məhrumdur. Bu rəqəmlər davamlı inkişafa mane olan əsas problemlərdən biridir.
Beynəlxalq Təhsil Günü dünya ölkələrinin bu sahədə əldə etdiyi uğurları və qarşıya çıxan çətinlikləri müzakirə etmək üçün platforma yaradır. Təhsil sistemində rəqəmsal texnologiyaların tətbiqi, qızların təhsilə cəlb olunması və inklüziv təhsilin təmin olunması qlobal təcrübədə əsas diqqət mərkəzində olan məsələlərdəndir. Məsələn:
Finlandiya keyfiyyətli və innovativ təhsil modeli ilə dünya miqyasında nümunə göstərilir. Burada əsas diqqət şagirdlərin şəxsi maraqlarına uyğun olaraq tədrisin fərdiləşdirilməsinə yönəlib.
Sinqapur isə STEM (Elm, Texnologiya, Mühəndislik və Riyaziyyat) sahələrinə önəm verərək qlobal rəqabətə davamlı mütəxəssislər hazırlayır.
Afrika ölkələri, xüsusilə qızların təhsil hüququ üçün mübarizəni gücləndirir və yeni infrastrukturlar yaradır.
Azərbaycan da təhsilin inkişafı istiqamətində son illərdə mühüm uğurlar əldə etmişdir. Xüsusilə məktəbəqədər və orta təhsil müəssisələrinin modernləşdirilməsi, rəqəmsal təhsilin təşviqi, xaricdə təhsil imkanlarının genişləndirilməsi, metodik xidmətin təkminləşdirilməsi ölkənin təhsil sisteminin güclənməsinə xidmət edir.
Azərbaycan hökuməti təhsilin keyfiyyətinin artırılması məqsədilə yeni islahatlar həyata keçirir. “Təhsil haqqında” qanun çərçivəsində müasir metodların tətbiqi, müəllimlərin peşəkar hazırlığının artırılması və beynəlxalq proqramlara inteqrasiya prosesi sürətləndirilib. Bakı və regionlarda yeni məktəblərin inşası, mövcud məktəblərin əsaslı təmir edilməsi, eyni zamanda peşə təhsili sisteminin təkmilləşdirilməsi bu istiqamətdə atılan mühüm addımlardandır.
Azərbaycan gənclərinin beynəlxalq təhsil proqramlarına qatılması da ölkənin qlobal rəqabət qabiliyyətini artırır. Bu gün Azərbaycan gəncləri dünyanın ən nüfuzlu universitetlərində təhsil alaraq ölkəyə yeni bilik və təcrübə gətirir.
Beynəlxalq Təhsil Günü qlobal və yerli miqyasda təhsil sahəsində inkişafı və qarşıya çıxan problemləri dəyərləndirmək üçün mühüm bir gündür. Təhsil yalnız fərdi inkişaf vasitəsi deyil, həm də sosial və iqtisadi tərəqqinin əsas dayağıdır. Azərbaycan da bu sahədəki nailiyyətləri ilə öz yerini möhkəmləndirməkdədir. Keyfiyyətli təhsil, innovativ yanaşma və beynəlxalq təcrübənin tətbiqi ölkəmizin gələcək inkişafını təmin edən ən güclü alətlərdən biridir.
Şəxsi inkişaf üzrə kouç,
təlimçi, marker, mentor, müəllim,
yazar, “Özünə Yox De” kitabının müəllifi
Nigar Mahi
