ABŞ-da LNG istehsalının artması Hindistan kimi bu neft məhsulunu istehlak edən ölkələrə fayda verəcək. Reuters xəbər verdeyinə görə, bu
barədə bazar ertəsi Hindistanın ən böyük qaz idxalçısı Petronet LNG-nin baş icraçı direktoru Akşay Kumar Sinq bildirib.
Ötən həftə Tramp ABŞ Enerji Nazirliyinə LNG ixracı üzrə yeni müraciətlərin dəyərləndirilməsinə yenidən başlanması ilə bağlı göstəriş verib. Bu proses Bayden administrasiyası tərəfindən dondurulmuşdu.
"Əgər ABŞ-da daha çox LNG zavodu tikilərsə, dünya bazarında LNG-nin qiymətləri stabilləşəcək", – Sinq mətbuat konfransında bildirib.
O, qiymət siyasətinə də toxunub.
"Hindistan kimi istehlakçı ölkələr üçün LNG qiymətləri 7-8 dollar/mmBtu diapazonunda olsa, tələbat kəskin artacaq. Çünki müştəri qıtlığı yoxdur, sadəcə olaraq qiymət amili vacib rol oynayır", – Sinq əlavə edib.
Sinq 2025-ci ilin birinci rübündə LNG qiymətlərinin 12-14 dollar/mmBtu səviyyəsində qalacağını proqnozlaşdırır. Bunun əsas səbəbi Avropada bu yanacağa güclü tələbatın olmasıdır.
ICIS analitiki Aleks Froley-nin verdiyi məlumata görə, Avropanın qaz ehtiyatları 2024-cü ilin eyni dövrü ilə müqayisədə təxminən 17 milyard kubmetr (bcm) azdır.
"Bu ehtiyatların yenidən bərpa etmək üçün əlavə həcm tələb olunacaq ki, bu da ilin ikinci rübündə qiymətləri yüksək səviyyədə saxlaya bilər", – Sinq bildirib.
O, həmçinin Petronet-in Şri-Lankaya LNG ixrac etməyə hazırlaşdığını da açıqlayıb.
Bu çərçivədə Petronet LTL Holdings-in Kolombodakı enerji stansiyalarına LNG tədarükü üçün beşillik müqavilə imzalayıb.
LNG ixracı Hindistanın cənubunda yerləşən Koçi terminalı vasitəsilə həyata keçiriləcək.
N.Təbrizli
www.anews.az
